ភ្នំពេញ៖ សម្តេចតេជោ ហ៊ុន សែន បានផ្តល់កិត្តិយសចូលរួមមង្គលការរបស់ពិធីការិនី ហ៊ិន ចាន់និរ័ត្ន និងលោក ឌី ពេជ្រ នាថ្ងៃទី២២ ខែធ្នូ ឆ្នាំ២០២៣ នៅមជ្ឈមណ្ឌលកោះពេជ្រ។

សម្តេចតេជោ ហ៊ុន សែន បានផ្តល់កត្តិយសអញ្ជើញចូលរួមក្នុងពិធីកាត់សក់គូស្វាមីភរិយាមួយនេះ ដោយសម្តេចមានបំណងចង់កាត់សរសៃសក់ កូនកំលោះ ទុកឱ្យកូនក្រមុំ ប៉ុន្តែដោយសារតែកន្ត្រៃអត់មុត។ សម្តេចតេជោ ក៏បានប្រាប់ឱ្យគូស្វាមីភរិយា ប្រសិនខឹងគ្នា ត្រូវចាក់បទចម្រៀង «ស្រអែមនឹកបង»។

សម្តេចធិបតីមានប្រសាសន៍ដូច្នេះថា៖ «ហេតុអីបានជាខ្ញុំចង់កាត់សក់ ចង់កាត់សក់ប៉ុន្មានសរសៃដើម្បីឱ្យនិរ័ត្នទុក ប្រសិនជាមានការខឹងគ្នាណាមួយត្រូវចាក់ចម្រៀងស្រអែមនឹកបងដែលអ្នកស្រី ហ៊ឹម ស៊ីវន ច្រៀងអំបាញ់មិញនេះ កាលណាចាក់ចម្រៀងហ្នឹងភ្លាម អ្វីដែលយើងខឹងគ្នាទាំងប៉ុន្មានគឺបាត់បង់អស់»។

នាល្ងាចថ្ងៃមង្គលការ សម្តេចតេជោក៏បានផ្តល់ការភ្ញាក់ផ្អើលមួយដោយតំណាងជាមេបាទាំងសងខាង និងកូនកំលោះ និងកូនក្រមុំ ថ្លែងអំណរគុណដល់ភ្ញៀវកតិ្តយសទាំងអស់ដែលបានអញ្ជើញមកចូលរួមមង្គលការនាឱកាសនោះ។

សម្តេចតេជោ មានប្រសាសន៍ថា៖ «ថ្ងៃនេះអ្នកទាំងអស់គ្នានៅទីនេះពិតជាមានការភ្ញាក់ផ្អើលចំពោះវត្តមានរបស់ខ្ញុំតំណាងឱ្យក្រុមគ្រួសារ ហេតុអ្វីបានជាមានរឿងនេះ ខ្ញុំនៅតែបញ្ជាក់ថា ឈាមច្បាស់ជាខាប់ជាងទឹក ខ្ញុំត្រូវមានការទទួលខុសត្រូវជាមួយនឹងអាពាហ៍ពិពាហ៍នេះ ដោយសារយើងជាតួអង្គខាងប្រុស យើងត្រូវមានការទទួលខុសត្រូវ»។

សម្តេចតេជោ បានផ្សំផ្គុំគូស្វាមីភរិយាមួយនេះ ដោយរើសថ្ងៃសុក្រ ថ្ងៃទី២២ ខែធ្នូ ឆ្នាំ២០២៣ ជាថ្ងៃអាពាហ៍ពិពាហ៍អ្នកទាំងពីរ។ សម្តេចបានលើកឡើងថា៖ «ឥឡូវខ្ញុំមានឈ្មោះថា អាចារ្យសុក្រ ចូលស្តីដណ្តឹងក៏អាចារ្យសុក្រ រើសថ្ងៃសុក្រ ហើយថ្ងៃរៀបអាពាហ៍ពិពាហ៍ក៏ថ្ងៃសុក្រ ប៉ុន្តែថ្ងៃសុក្រ យើងរើសចំពេលខែខ្នើត គឺយើងមិនរើសចំពេលរនោចនោះឡើយ»៕